Diktačálli ja dáiddár Niillas Holmberg oassálasttii otne bearjadaga MTV3-kanála Huomenta Suomi -iđitprográmmii.
Jearahallamis Holmberg ovttas jorgaleaddji Kaija Anttoneniin muitaleigga sámegirjjalašvuođas, mii lea dán vahkoloahpa oaidninláhkai Turku girjemeassuin.
"Mun in sáhte dál lohkat divtta"
Jearahallama loahpabealde dárkkuhussan Holmbergis lei lohkat iežas divtta, muhto dan sadjái son cuiggodiige Suoma stáhta.
Holmberg álggahii iežas sátnevuoru sámegillii ja jotkkii suomagillii.
– Mun in sáhte dál lohkat divtta mu iežan diktagirjjis.
– Dát jahki lea leamašan Suoma stáhtii berošmeahttunvuođa čoaskačoalat jahki sámegažaldagaid oasil. Stáhta ii atte sápmelaččaid ieža mearridit das, gii lea sápmelaš. Suopma ii nappo gudnejahte riikkaidgaskasaš eamiálbmogiid guoski soahpamušaid. Stáhta ii hálit gullat sápmelaččaid dákkár áššiin, mat gusket sámeguovllu eanangeavaheami. Seammás dat goittotge ávkkastallá ja addá jorggu govva sámekultuvrra riggodagain go ruhtada video, mii vuovdala Suoma mátkeealáhusa, logai Niillas Holmberg njuolga kamerai.
– Dat, ahte čohkkán dás ja logan dákkáraš prosá dán sádjai, ahte logašin mu divttaid, muitalehkkos dan birra, ahte Suopma lea hui rasisttalaš riika, loahpaha Holmberg sátnevuorus MTV3 jearahallamis.
Niillas Holmberg mieđihii Yle Sápmái tv-prográmma maŋŋá, ahte MTV3-kanála prográmmajođiheaddji ii lean duđavaš su ovdanbuktimii, muhto jáhkká, ahte sápmelaččat atnet dagu árvvus.
Geahča olles jearahallan Huomenta Suomi -siidduin.